Sumarbúðir

Ég fór aldrei í sumarbúðir sem krakki. Líklega hef ég aldrei beðið þess bætur. En núna gefst mér tækifæri á að bæta mér upp það sem ég fór á mis við í æsku. Loksins fæ ég að fara í sumarbúðir. Þær eru þó hvorki í Kaldárseli né Vaglaskógi (eða hvar það nú var sem þær voru staðsettar í gamla daga), heldur í smákrummaskuði í Svíþjóð sem enginn þekkir, ekki einu sinni Svíar: Herräng. Athugið að til að nafnið skiljist í Stokkhólmi þarf að bera það fram með sænskum hreim, sem kemur sjálfkrafa með því að leggja áherslu á bæði atkvæðin.

Eins og sést á þessari mynd eru þetta engar venjulegar sumarbúðir. Þetta eru DANSbúðir, þar sem aðallega er dansað Lindy Hop, en einnig nokkrir aðrir óæðri dansar. Og sjálfur Frankie Manning verður á staðnum, en hann er einna elstur í hettunni á þessu sviði. Hann er fæddur árið 1914 og er 93 ára á þessu myndbandi.

 

Að lokum eru hér skilaboð til nágranna minna: Ekki týna ykkur í dagdraumum, húsið mitt verður EKKI autt á meðan ég er í burtu!

Athugasemdir

[Jenný Anna Baldursdóttir, 17.7.2008 kl. 01:15]

Ég hef heyrt talað um þetta Krummaskuð.  Jájá, tók svo vel eftir þegar ég bjó í Sverige.

Rosalega er þetta flottur karl og dansinn líka.

Góða ferð.

[Þuríður Björg Þorgrímsdóttir, 17.7.2008 kl. 23:58]

Takk, Jenný  Það er víst eitthvað misjafnt hvort fólk viti hvaða staður þetta er eða ekki. Sumir þekkja hann bara af þessum dansbúðum.

[Laufey Ólafsdóttir, 18.7.2008 kl. 03:45]

Þegar ég var yngri hefði ég miklu frekar viljað fara í dansbúðir en sumarbúðir. Er enn sömu skoðunar. 93 ára!!! Ég þekki marga 25 ára sem líta út fyrir að vera eldri. Góða ferð og skemmtun!