Pata Pata

Smá upplyfting á erfiðum tímum, í minningu Miriam Makeba:

Þessi útgáfa af laginu með Tito Puente er ekki síðri. Það skemmtilega er að fólk í latnesku Ameríku hefur alist upp við þessa útgáfu og margir telja lagið vera al-latneskt.

 


Skrár tengdar þessari bloggfærslu:

Góðar hugmyndir

Ríkisstjórnin kynnti um daginn nokkrar aðgerðir sem eiga að hjálpa okkur lýðnum að lifa af þá erfiðu tíma sem framundan eru. Ég hef á tilfinningunni að megnið af þeim sé runnið undan rifjum Jóhönnu Sigurðardóttur, þeirrar góðu konu. Eitt af því var að fresta verðbótum svo greiðslubyrðin lækki hjá húsnæðiseigendum. En betur má ef duga skal, því sú aðgerð er bara til þess fallin að lengja í hengingarólinni. Við þurfum á endanum að borga þessar ranglátu verðbætur.

Hvernig væri t.d. að endurskipuleggja vaxtabæturnar þannig að fólk fari aftur að fá þær? Ég fékk vaxtabætur hér áður fyrr. Alveg slatta. Ég á við að mig munaði um þær. En svo hættu þær að berast. Ef ég hefði hins vegar verið í sambúð eða hjónabandi þá hefði ég fengið eitthvað áfram. Ég vil bara vinsamlegast benda ráðamönnum á það að einstæð móðir (eða faðir) þarf alveg jafn stórt húsnæði og hjón með jafnmörg börn, en hvar er réttlætið í því að fjölskylda hjónanna fái vaxtabætur en ekki þeirrar einstæðu (þess einstæða), sem þó hefur aðeins eina fyrirvinnu á heimilinu og þar af leiðandi lægri tekjur? Þetta er ekkert annað en mismunun.

Önnur hugmynd er að endurskoða aftur fasteignagjöldin. Þau voru endurskoðuð þegar húsnæðisverð rauk upp úr öllu valdi. Nú fer það að lækka aftur, óhjákvæmilega, og þá legg ég til að fasteignamatið verði lækkað aftur í samræmi við það. Það væri sanngjarnt.Kýr

Að lokum legg ég til að 10-11 fari úr fjósinu á Barónsstíg og það verði gert að fjósi aftur. Hægt væri að vera með slatta af kúm og nokkur naut, breyta bílastæðinu í engi og þá geta kýrnar gengið úti á sumrin. Svo væri hægt að fara á staðinn með mjókurbrúsa eða -flösku og kaupa sér nýja mjólk, ófitusprengda og ógerilsneydda. Svo ekki sé talað um hvað börnin okkar græða mikið á því að hafa tækifæri til að umgangast nautgripi og sjá með eigin augum hvaðan mjólkin kemur.


Upp í mót

Ég var minnt á gamalt kvæði í dag. Kvæði sem ég heillaðist mjög af sem barn og valdi það til að læra utanbókar. Ég kann það ekki lengur utanbókar en ég las það aftan á sendiferðabíl í dag. Mér fannst það lýsa svo vel því sem framundan er. Frá byrjun til enda:

Fjallganga

I

Urð og grjót,

upp í mót.

Ekkert nema urð og grjót.

Klífa skriður,

skríða kletta.
Velta niður,

vera að detta.

Hrufla sig á hverjum steini,

halda að sárið nái að beini.

Finna hvernig hjartað berst,

holdið merst

og tungan skerst.

Ráma allt í einu í Drottin;

- Elsku Drottinn!

Núna var ég nærri dottinn!

Þér ég lofa því að fara

þvílíkt aldrei framar, bara

ef þú heldur í mig núna!

Öðlast lítinn styrk við trúna.

Vera að missa vit og ráð,

þegar hæsta hjalla er náð.

II

Hreykja sér á hæsta steininn,

hvíla beinin.

Ná í sína nestistösku,

nafn sitt leggja í tóma flösku.

Standa aftur upp og rápa,

glápa.

Rifja upp og reyna að muna

fjallanöfnin:

Náttúruna.

Leita og finna

eitt og eitt.

Landslag yrði

lítilsvirði,

ef það héti ekki neitt.

III

Verða kalt, er kvöldar að.

Halda seint og hægt af stað.

Mjakast eftir mosatónum.

Missa hælinn undan skónum.

Finna sig öllu taki tapa:

Hrapa!

Velta eftir urð og grjóti,

aftur á bak og nið'r í móti.

Leggjast flatur,

líta við.

Horfa beint í hyldýpið.

Hugsa sér

að höndin sleppi.

Hugsa sér

að steinninn skreppi,

vita urðir við sér taka,

heyra í sínum beinum braka.

Deyja áður dagur rynni.

Finnast ekki einu sinni.

IV

Koma heim og heita því,

að leggja aldrei upp á ný.

Dreyma margar næstu nætur

hrap í björgum, brotna fætur.

Segja löngu seinna frá því;

Sjáið tindinn! Þarna fór ég.

Fjöllunum ungum eiða sór ég,

enda gat ei farið hjá því,

að ég kæmist upp á tindinn.

Leiðin er að vísu varla

vogandi, nema hraustum taugum,

en mér fannst bara

best að fara

beint af augum.

Því hversu mjög sem mönnum finnast,

fjöllin há, ber hins að minnast,

sem vitur maður mælti forðum

og mótaði í þessum orðum,

að eiginlega er ekkert bratt,

aðeins mismunandi flatt.

Tómas Guðmundsson

Mórallinn er: Þetta verður ekki eins erfitt og við höldum, aðeins ef hugarfarið er rétt.


Peningar eða ...? Hvort viltu frekar hugsa um?

Rosalega er ég orðin leið á fréttum um efnahagsmál!! Það heyrast og sjást varla fréttir um annað, nema ef vera skyldi um fjöldamorð og ofbeldi gagnvart börnum. Eins og það sé eitthvað skárra...

Ég held að það sem við þurfum sé að HÆTTA að hugsa um peninga og fara að hugsa um eitthvað jákvæðara.

Yfir 30 manns eru á byrjendanámskeiði í Lindy Hoppi. Það eru yfir 30 manns sem fóru að hugsa um eitthvað annað en ömurleg efnahagsmál og ákváðu að eyða einu kvöldi í viku í eitthvað skemmtilegt og gefandi. Ég veit um nokkra aðila sem mættu taka sér þetta fólk til fyrirmyndar. Einn þeirra heitir Davíð Oddson og er yfirmaður peningamála á Íslandi.

Slakaðu á, Davíð, og dansaðu!


Ábyrgð hvers?

"Í  Fjarðabyggð fengust þær upplýsingar að almenningssamgöngur væru ekki meðal skylduverkefna sveitarfélaga og ekki gert ráð fyrir þeim í tekjustofnum."

Er hún að segja að almenningssamgöngur séu ekki skylduverkefni sveitarfélaga almennt? Ef svo er, hvers vegna ekki? Er það ekki öllum í hag, alls staðar, að til séu nothæfar almenningssamgöngur í heimabyggð? Það er augljóst á höfuðborgarsvæðinu, en ég held að minni sveitarfélög græði líka á því að allir íbúar séu ekki alltaf háðir einkabílnum.

Ef sveitarfélögum er ekki skylt að veita þessa þjónustu, hver á þá að bera ábyrgðina? Grunnþjónusta við íbúa á alltaf að vera á ábyrgð ríkis og sveitarfélaga.


mbl.is Segja þvert nei við kostnaði
Tilkynna um óviðeigandi tengingu við frétt

Fólkið í forgang?

Á sama tíma og frú borgarstjóri segir að "nú þurfi að stíga á bremsuna, nokkuð laust, til þess að ekki þurfi að kippa í handbremsuna síðar" og  talar um "teikn um þrengingar í rekstri Reykjavíkurborgar", lýsir hún því yfir að tjörnin í Reykjavík verði að sjálfsögðu hreinsuð, jafnvel þótt það kosti einhverja peninga.

Vissulega er nauðsynlegt að hreinsa tjörnina af saurmengun. En ég minnist þess ekki að hafa nokkurn tímann heyrt frá borgarstjórn að "að sjálfsögðu verði að finna húsnæði handa heimilislausum" eða " að sjálfsögðu verði að redda fleiri félagslegum íbúðum í snatri, jafnvel þótt það kosti einhverja peninga" eða "að sjálfsögðu styrkjum við líknarsamtök sem gefa fátæku fólki mat".

Þegar eitthvað þarf að gera sem kemur fátæku fólki við þarf borgarstjórn að velta fyrir sér hverri krónu og virðist eiginlega sko ekki hafa efni á því. Þá þarf alltaf að stíga á bremsuna. En þegar þarf að hreinsa tjörn eða kaupa hús, ÞÁ eru allt í einu til peningar!

Eru til peningar eða eru ekki til peningar???

Hanna Birna og co. þurfa aðeins að endurhugsa forgangsröðina hjá sér núna.


mbl.is Fjármálin í forgang
Tilkynna um óviðeigandi tengingu við frétt

Næsta síða »

Um bloggið

Þuríður Björg Þorgrímsdóttir

Höfundur

Þuríður Björg Þorgrímsdóttir
Þuríður Björg Þorgrímsdóttir

Spurt er

Hvernig húsi viltu helst búa í?

Tónlistarspilari

Facto Delafé Y Las Flores Azules - Enero En La Playa

280 dagar til jóla

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Heimsóknir

Flettingar

  • Í dag (19.3.): 0
  • Sl. sólarhring:
  • Sl. viku: 1
  • Frá upphafi: 0

Annað

  • Innlit í dag: 0
  • Innlit sl. viku: 1
  • Gestir í dag: 0
  • IP-tölur í dag: 0

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband